Sistema Regional de Información
en línea para Revistas Científicas de América Latina,
el Caribe, España y Portugal

Ye oxetivu del presente trabayu, parte xebrada d’un estudiu más ampliu, presentar un breve estudiu de calter semióticu sobre’l teatru representáu en llingua asturiana na villa de Xixón ente los años 2011-2013, siguiendo la metodoloxía de la semiótica teatral propuesta pol profesor José Nicolás Romera Castillo; l’estudiu mencionáu constitúi nesti sen el primer trabayu que se fai al respeutive d’esta materia acordies con criterios d’análisis sistemáticos y rigurosos de la citada metodoloxía. L’artículu estáyase en seis epígrafes, presentándose nél sinón toes sí les más de representaciones teatrales feches n’asturianu en Xixón nel periodu de tiempu  citáu arriba. Nesti sen, llueu d’un primer epígrafe con unes  anotaciones previes de calter técnicu y una güeyada mui  xeneral y necesariamente curtia del panorama teatral asturianu atendiendo a la historia del teatru n’Asturies, al númberu de representaciones, de compañíes y de festivales, a les recaudaciones y dellos otros datos, rellaciónense en segundu llugar les fontes bibliográfiques y hemerográfiques consultaes pa la ellaboración del testu y los gráficos emplegaos. Nel epígrafe 3 del trabayu ponse l’enfotu na redaición d’una pequeña ficha-resume de caúna de les obres representaes a lo llargo del periodu temporal estudiáu onde se presenta una curtia sinopsis del argumentu de la obra y delles notes sobro l’autor, el director, los actores y les actrices que participen, el llugar de representación, el xéneru…, asina como’l preciu de les entraes. Toos estos datos resumiránse per aciu d’una tabla nel epígrafe 4. Polo que se refier al quintu epígrafe del testu, íguase un pequeñu estudiu a partir de les informaciones presentaes nes anteriores estayes col envís de dar a conocer los datos qu’ufierten les representaciones n’asturianu nesti periodu referentes al xéneru teatral concretu, el tipu d’obra, etc. siempres con encontu de gráficos esplicativos. Ponse puntu al testu con unes conclusiones finales y la bibliografía.

L’abondosa tipoloxía de documentos notariales esistentes preséntase como una amuesa d’altu valor dende’l puntu de vista del estudiu del léxicu. Esti fechu cobra especial relevancia nel casu de los axetivos (un ámbitu escasamente estudiáu y esplotáu, al centrase la mayor parte de los estudios nel campu de los sustantivos), por cuenta de que’l notariu tien qu’identificar de manera inequívoca –n’ocasiones abondosa y minuciosa– cada elementu del patrimoniu del propietariu que se recueye nel documentu. El ganáu, por cuenta de la so condición de bien semoviente, tamién s’atopa llargamente representao nesti tipu de documentos. A la hora de caracterizar a cada animal, suelen emplegase axetivos referíos a la edá, la fertilidá o infertilidá de les femes y de los machos, la producción de lleche, traces destacaes de la fisionomía, función, etc. Sicasí, son los axetivos relativos al ámbitu del color los qu’acompañen de manera más frecuente al sustantivu que designa al animal. El presente estudiu tien como oxetivu ufiertar una pequeña amuesa del abanicu cromáticu propiu de la Edá Media a partir dalgunos de los axetivos pertenecientes al campu semánticu del color que pueden atopase nos documentos medievales lleoneses ya intentar precisar la so referencia cromática, la tonalidá o color al qu’aluden, a partir, principalmente, de fontes lexicográfiques, emprestando especial atención a aquelles relatives al dominiu asturlleonés como son el Diccionariu de la Llingua Asturiana publicáu pola Academia de la Llingua Asturiana, el Diccionario General de la Lengua Asturiana del profesor X. Ll. García Arias o’l Léxico del leonés actual de la profesora Jeannick Le Men.

Son munches les versiones que se fixeron, a lo llargo de la hestoria de la lliteratura, del mitu de Píramo y Tisbe, desque Publio Ovidio Nasón (Sulmona, 43 a. C.-Tomis, 17 d. C.) recoyó la lleenda –bien poco conocida hasta entós, en palabres del llatinu– na so obra les Metamorfosis (vv. 55-166). Nel presente trabayu analizamos y comparamos col orixinal ovidianu l’adaptación que nos ufierta, n’asturianu, el clérigu y poeta Benitu de l’Auxa (Carreño, 1742-¿1814?), editáu pol filólogu y profesor Xuan Busto Cortina nel añu 2012. Magar el vate romanu entrepola’l mitu a cuenta d’allixerar los llabores de les Miníades y revelanos –pos al igual que n’otros munchos pasaxes del so poema’l mitu desempeña una función esplicativa– la metamorfosis de la blancura orixinal de les mores pa siempres escures, l’autor de Carreño asítianoslu nuna redolada llabradora, nun escenariu costumista, tres una esfoyaza, y utiliza la fábula con fines moralistes y dogmáticos, asina como con una esplícita enseñanza tremada por munchos de los pasaxes qu’amplifica, tresforma, omite o recrea: l’amor desatamañáu nun conduz sinón a l’autodestrucción y al desastre. Tanto l’estilu como los conteníos tán bien d’acordies colos cánones de la dómina del escritor asturianu y de los presupuestos amorosos del Barrocu. Coles mesmes, el conseyu que la lleenda d’Auxa nos da ye bien esperable dende les primeres octaves, el tonu bien sentenciosu y la intención bien avenida colos creos de la ilesia. Y, como’l mesmu editor pon de manifiestu, quiciabes lo realmente novedoso de la interpretación del mitu que fai De l’Auxa seya l’aportunar nes consecuencies económiques que sobrevienen.

Esti trabayu investiga les llingües asturiana y gallega, asina como la presencia de les mesmes nel espaciu públicu. Considérase que l’análisis del paisaxe llingüísticu (linguistic landscape) dexa especificar el nivel de la visibilidá del idioma dau y estremar los factores que lu determinen. La primer parte del artículu céntrase n’aclarar les nociones básiques rellacionaes col fenómenu del plurillingüismu y presentar informaciones sobre la diversidá llingüística d’Asturies y de Galicia. Conséñense tamién les publicaciones más recién o más relevantes que traten la mesma problemática. Darréu, descríbense los resultaos d’un estudiu compuestu de tres etapes. Les dos primeres investiguen el paisaxe llingüísticu d’ocho fasteres rurales y urbanes d’Asturies (Xixón, Uviéu, Mieres del Camín y Cuideiru) y de Galicia (A Coruña, Santiago de Compostela, Vilagarcía de Arousa y Muros). La tercera ye, sicasí, un análisis contrastivu que tien como oxetivu principal distinguir los factores diatópicos y diafásicos qu’influyen nel nivel de la visibilidá de les llingües llocales nel espaciu públicu de les dos rexones p’alcontrar paralelismos y dixebres ente elles. El corpus fotográficu, que dispón de más de quinientes semeyes, foi creáu especialmente pa esti trabayu.

Esti trabayu destaca una singularidá de la llingua asturiana en rellación a otros romances de la Península Ibérica, nos que la concurrencia ente los clíticos de dativu y acusativu, idénticos en ciertu nivel relevante d’astracción, fuerza dalgún tipu de recursu que bien los funde o bien los modifica. N’asturianu, sicasí, el dativu caltiénse formalmente idénticu en tal contestu. El trabayu plantega la tesis de que tal estáu de coses implicó l’asimilación histórica de propiedaes del clíticu de llocativu per parte del de dativu, estratexa per aciu de la que consigue estremase abondo del clíticu del acusativu. El trabayu sigue la pista histórica del procesu al traviés de la documentación medieval asturiana y constata casos en que les formes del llocativu y del dativu funcionend’una manera indistinta. La tesis del trabayu ye qu’esta circunstancia facilitó, per una parte, la tresferencia de traces del llocativu al dativu y, per otra parte, una abondadiferenciación ente dativu y l’acusativu. Rellaciona, amás, el procesu con otru fenómenu primeramente descritu nel que la indiferenciación ente’l dativu y l’acusativu resuélvese per aciu de la so fusión nuna forma clítica contracta. La fortaleza de la hipótesis asítiase en que tolos mecanismos emplegaos cunten con un ampliu respaldu empíricu na so aplicación, tanto a casos allegaos al estudiáu como a casos por completu independientes, que paecen probar que respuende a una constricción gramatical de rangu universal.

L’oxetivu d’esti artículu ye dar cuenta del sistema de denominación de los neños abandonaos o «fayonos» d’Asturies. La peculiar situación social ya orixe –n’abondoses ocasiones escuru ya illexítimu– d’estos neños traduzse nunes menes concretes de denominación que se plasmen nos Libros de los Expósitos del Real Hospiciu d’Uviéu, institución encargada de la so acoyida y crianza dende l’añu 1752. Pa esti estudiu tomóse como referencia una muestra de neños abandonaos ente finales del añu 1784 y finales del añu 1786, correspondientes al Libro de los Expósitos númberu 15 (signatura 14012), conserváu güei nel Archivu Históricu d’Asturies. Faise, per un llau, un estudiu tipolóxicu de les cadenes antroponímiques d’identificación de los fayonos en función de la so estructura morfosintáctica y les posibles motivaciones de los nomes y, per otru llau, una breve caracterización de la variación llingüística nesti Libro de los Expósitos, poniendo especial enfotu nel contactu ente asturianu y castellanu.

.

Nun hai resume.

L’oxetivu d’esti trabayu ye proponer una reflexón sobro’l valir cultural de les ficciones cinematográfiques asturianes dende la perspeutiva imagolóxica. Como una de les principales presees de la lliteratura comparada, la imagoloxía tradicional vieno ocupándose del análisis de carauterístiques propies de les lliteratures nacionales como son temes, personaxes y arquetipos, o de la perceición que se tien nel estranxeru d’una lliteratura nacional. Más recién, y gracies a les ufiertes de la socioloxía y de la semiótica, la imagoloxía desendolcó conceutos que valen pa comprender meyor non solo la lliteratura, sinón tamién la producción artística y cinematográfica en sociedaes complexes que yá nun se definen namái qu’acordies con criterios identitarios. Nesti artículu discútense dos d’estos conceutos imagolóxicos referíos al cine fechu n’Asturies anguaño. El primeru pescuda na asimetría ente la imaxe que se proyeuta d’Asturies nel cine de ficción rodáu n’Asturies dende una perspeutiva asturiana (auto-imaxe) y la que s’alvierte nel cine rodáu n’Asturies dende una perspeutiva forana (hetero-imaxe). El segundu conceutu ye’l de marca-llugar (place branding) según se construye, en referencia a Asturies, nel cine contemporaneu. Anque un estudiu percuriáu de la Marca Asturies trespasaría enforma l’ámbitu puramente cinematográficu, l’análisis del cine de ficción fechu n’Asturies ufierta claves mui nidies de les estratexes retóriques y polítiques de la Marca Asturies pola so capacidá pa sintetizar en testos fílmicos de proyeición nacional ya internacional les sos carauterístiques más relevantes. L’emplegu de la llingua asturiana, les referencies lliteraries y cinematográfiques, el comentariu históricu y políticu y el recursu a rellatos promocionales de marca (por poner un casu, «Asturies, Paraísu Natural»), son delles d’estes carauterístiques.

Nesti artículu inventaríense y coméntense les inscripciones romanes descubiertes en territoriu asturianu que nun se publicaron na obra Epigrafía romana de Asturias de Francisco Diego Santos, asoleyada en 1985. La mayoría d’elles atopáronse o diéronse a conocer dempués d’esa fecha equí y allá, en publicaciones diverses. Ye un conxuntu de doce inscripciones que pertenecen a distintes tipoloxíes epigráfiques: hai cuatro inscripciones votives, dos funeraries, delles sobro oxetos d’usu domésticu, una inscripción pintada ya inclusive un testu del ámbitu de la epigrafía xurídica, la tabula censualis, que ye absolutamente esceicional pola escasez d’inscripciones d’esti tipu. Tienen gran interés porque vienen añidir datos a otros conocíos enantes y amás ufierten otros nuevos, por exemplu nel ámbitu relixosu, como son dos nueves inscripciones pal catálogu de dedicatories a los llares viales, la primer inscripción dedicada a Tutela n’Asturies y la posibilidá d’un nuevu testimoniu d’una divinidá poco conocida, Dovitero. Tamién ufierten nuevos testimonios a la onomástica llatina del territoriu asturianu: Placidius, Assinius, Medugenus, Cesaron, Bodocena, Aravus y tolos nomes qu’apaecen nel llistáu de la tabula censualis. Conséñense nestos testos nuevos topónimos antiguos qu’ayuden a alcontrar los sos allugamientos y a entender meyor la etimoloxía de dellos topónimos actuales, asina castellum Agubri, [B]uroflavienses, Ocela, Elaniuum/Elanum. Per otra parte contribúin a afondar en cuestiones relatives a aspeutos sociales y d’organización política de los ástures, como la denominación xurídica de dellos llugares, asina nel casu del epígrafe castellum, y ufierten nomes de delles xentes que nun se conocíen anteriormente, como los cilúrnigos de Xixón.