Sistema Regional de Información
en línea para Revistas Científicas de América Latina,
el Caribe, España y Portugal

L’oxetivu de les páxines vinientes ye facer una presentación del Proyectu Fernán-Coronas, una iniciativa de la Fundación Valdés-Salas en collaboración cola Universidá d’Uviéu y financiada pola Conseyería de Cultura, Política Llingüística y Turismu del Principáu d’Asturies que se propón axuntar, catalogar, describir, dixitalizar y poner en rede los documentos del Padre Galo, qu’hasta esti momentu s’atopaben espardíos per distintos archivos públicos y privaos. Asina, dase cuenta de los avances realizaos nesti primer añu de trabayu, onde s’estudiaron de manera fonda dos de los principales archivos, entamóse l’estudiu d’un terceru y afitáronse los criterios de catalogación y descripción que s’emplegarán n’archivos socesivos. Como primer amuesa de los afayamientos realizaos, espublícense equí once poemes inéditos de Fernán-Coronas descubiertos nestos archivos.

José R. Morala, Roberto González-Quevedo y Nicolás Bartolomé (2021),La lengua leonesa: literatura y textos, Lleón: Cátedra d’Estudios Lleonesesy Universidá de Lleón.

Esti trabayu desendolca la propuesta d’un principiu d’imbricación que fai posible inxertar los fraseoloxismos unos n’otros, dando llugar a amplificaciones que nun xustifiquen un incrementu taxonómicu de les subclases fraseolóxiques, porque sedríen operaciones (micro)sintáutiques ente frasemes. La tensión ente la fixación interna propia de tou fraseoloxismu y la so capacidá de mutua imbricación ayuda a comprender la convivencia contradictoria ente la fixación que define estes unidaes na llingua y la variación que demuestren nel discursu. Con esti oxetivu, el nuesu estudiu trata paralelamente distintos tipos de frasemes n’español, francés, italianu, portugués, catalán y asturianu.

Esti trabayu recueye aquelles pallabres n’asturianu qu’empleguen los amigosde Xovellanos tanto na so correspondencia col xixonés como nos estudios sobre la llinguaasturiana qu’intercambien con él. La mayoría provién de la correspondencia de ValdésLlanos con don Gaspar (Cartes de Theresina del Rosal), pero hai tamién una mozadinad’elles d’un estudiu sobre l’asturianu de Francisco de Paula Caveda y Solaresqu’unvia al so amigu, o d’una carta n’asturianu de Martínez Marina. Otres pallabres vanapaecer de mou ocasional, como’l términu ocle d’una epístola de Fernando Casado deTorres a Xovellanos.

Ana María Cano González: Llingua, tierra, nomes… Estudios d’Onomástica Románica (1987-2017)

Preséntase nesti trabayu una reflexón crítica alredor de la buelga histórica que les fales asturlleoneses y, por estensión, el románicu llingüísticu peninsular, dexaron nel español americanu a lo llargo de la so historia. Cuando s’afita una perspeutiva iberorrománica n’Hispanoamérica la consideranza ya interpretación de los fechos llingüísticos amplíase y ufre datos y perspeutives d’investigación nuevos. A esta realidá Corominas denomóla Indianorrománica. Con esti términu concíbese la realidá llingüística hispanoamericana como una proyeición, otra combinación nun territoriu nuevu y nunes nueves circunstancies de contautu ente llingües y dialeutos del románicu peninsular. Nesti sen, l’oxetivu básicu del trabayu ye facer una revisión xeneral sobre’l tema col  fin d’ufiertar una interpretación ya integración de lo que conocemos no tocante al orixe y constitución de les fales americanes col envís de precisar más afayadizamente la presencia asturlleonesa n’Hispanoamérica y la so buelga llingüística. Conclúyese afitando que ye necesaria una mayor investigación sobre cómo’l románicu peninsular se proyeutó nel castellanu americanu (como ye’l casu de la presencia asturlleonesa nes fales americanes del español), entamando pela ellaboración d’un estáu de la cuestión afitándose nos conocimientos que se tienen de les buelgues de los romances n’América y enfocando llueu críticamente delles cuestiones importantes plantegaes na bibliografía, pa ufiertar darréu d’ello les nueves perspeutives a partir de los avances producíos al rodiu de los oríxenes de les variedaes americanes y los testimonios documentales.

Nes páxines que siguen, allugando’l xéneru sayagués como puntu de partida, interpretándolu dende la sociollingüística como una espresión de jaronismo y faciendo referencia a obres y testimonios de dalgunos de los sos principales representantes como Juan del Enzina y Manuel Herrera de Gallinato, analizaráse cómo la diglosia lleonesa da signos de prevalencia en testos del Renacimientu. La ideoloxización de la xerarquía ente la llingua A y la llingua B al traviés de la lliteratura afitó prexuicios llatentes ya influyó enforma na temprana y fonda estigmatización de les variedades zamorano-salmantines, amosando rasgos entá presentes nel discursu metallingüísticu contemporaneu sobre l’asturianolleonés. Faciendo usu de la lliteratura del Sieglu d’Oru p’asitiar el lleonés nun llugar de subalternidá frente a la llingua oficial, les estructures de poder de la Corona de Castiella llantaron, inalvertidamente, les bases pa una estigmatización secular y les consecuencies que tuvo ente los falantes p’acelerar la so perda son apreciables na realidá llingüística de güei. Asina mesmo, pondremos un procuru especial nel procesu de camudamientu d’adscripción etnollingüística per aciu del conceutu d’englobamientu descritu por Louis Dumont valiéndonos de documentos d’época qu’amuesen cómo dende la Corona va diliéndose lo lleonés dientro de la cosmovisión castellana, favoreciendo la perda de conciencia y llealtá llingüístiques. Los procesos de sayaguesización y cambéu d’adscripción etnollingüística nel Reinu de Lleón amiéstense nun contestu más ampliu d’hexemonía política castellana nos sieglos XVI y XVII qu’enllaza dempués cola ellaboración d’un rellatu nacional nel sieglu XIX. Pesllaremos faciendo referencia a muestres de nacionalismu llingüístico castellanocéntricu n’obres científiques, onde llega a negase’l caltenimientu del lleonés como códigu estremáu del español, y a testimonios de falantes de los siglos XIX y XX qu’ufren exemplos nidios d’estigmatización.

Dende los años ochenta, n’Asturies y n’asturianu, un bon piñu de publicaciones recoyeron o recueyen conteníos relacionaos cola antropoloxía y/o la etnografía, manteniéndose anguaño tres que siguen inxertando estes temátiques. Ente les revistes que yá nun esisten cítense Ástor, cartafueyos de la Lliga Celta d’Asturies (1981-1990); El canciu’l cuélebre. Revista cultural asturiana (1995 2000); El cuirno (2005-2007) o N’Ast. Cartafueyos d’ensayu (2007 2013), como dalgunes de les que dedicaron seiciones a los estudios culturales. Ente les que se mantienen n’activu, el númberu diez de LLAA (1984) anició un apartáu específicu nomáu «Materiales d’Antropoloxía», que de magar entós foi una parte importante n’abondos númberos del boletín oficial de l’ALLA anque yá apaecieren dellos conteníos d’esti tipu n’exemplares anteriores. Dende 1991 Cultures. Revista asturiana de cultura asoleyó ventiún volúmenes dedicaos dafechu a l’antropoloxía y la etnografía, aguantando nel tiempu como la única revista específica de la disciplina antropolóxica fecha n’Asturies. Finalmente, nel añu 1996 entama la publicación Asturies. Memoria encesa d’un país, viendo la lluz hasta agora un total de trenta y siete númberos onde les páxines dedicaes a l’antropoloxía y la etnografía son abondoses. Esti breve testu quier facer un repasu a estes publicaciones, a los y les autores que participaron y participen anguaño coles sos aportaciones, a les temátiques y a los estudios que se trataron y que se pueden estudiar nelles, formando un bon corpus de conocimientu.

A partir de l’abondosa, anque rala, documentación asturiana (ss. IX-XIII) na que’l pan y la sidra dexen escatafinos en toa clas d’actos xurídicos documentaos, quiximos amosar una realidá, al empar que socioeconómica, tamién cultural. Revélase nos testos el ciclu productivu de los cereales a partir de los que, per aciu de destremaes llabores, enfornaráse’l pan. Un pan que va ser consumío por individuos de distintos estamentos acordies cola calidá de la fariña. D’esta manera, esos testos fálennos de cultivos de fasteres de monte o de terrenos averaos a la costa en forma d’escanda, miyu o panizu, de molinos que dan anuncia de bonanza económica de magar el sieglu XII, de mercáu con bregadores qu’amasen y panaderes que faen y vienden pan. Igualmente, d’escedentes de sidra qu’apuerten a la ciudá y suponen negociu pa quien lo produz, polo regular el monesteriu, que se fixere con un númberu estimable de pumaraes. Tamién pal comerciante y pal posaderu. Y nun van ser sólo los llabradores, que nun tienen accesu al vinu, los que beban la sidra que mayaron enantes; tamién lo fadrán burgueses, probes y pelegrinos y quiciabes dalgún clérigu. D’esta miente, pan y sidra ufiértensenos como un binomiu orixinal ya identitariu en rellación a los demás territorios peninsulares, inclusive hasta d’aquellos onde’l cultivu de los pumares yera un llabor común.

Nun hai resume.